ابو النجا البشير مشرف
عدد المساهمات : 324
تاريخ التسجيل : 13/08/2010
| موضوع: أنـا الغلــــطان -للشاعر صلاح سيد احمد الغول الإثنين أغسطس 23, 2010 2:04 pm | |
| يحكى الغول مناسبة القصيدة قائلا : (أنني رددت على احد من منسوبي إحدى الدول العربية على الهاتف (بجملة نعم يا يا زول ) فرد علي مستاءً : بتقول زول ليه شايفني لافي بتاعه على دماغي فقلت له: (ما اظن عندك دماغ حتى تلف عليه البِتاعه) و أنا الغلطان) ====================
تقول لي زول؟! بقول ليك زول !! مالو الزول؟ و انت بتعرف إيه للزول ؟ سخيف وجهول كمان زعلان خلاص يا سيدي أنا غلطان شطحت وكنت فاكرك زول زول الماهو عاجبك ده الله الخلقو خلقو كده سمرة لونو من لون طينو يبقى الفرق بينك و بينو إنو نضيف و ابيض قلبو عارف قدرو شاكر ربو ساتر عرضو ماسك دينو مخلص أمين وديع و رزين حشيم القول بديعو رصينو لطيف وعفيف و كاتلو حنينو أسد في الحاره لابختاك و لابرجاك تجيو في عرينو أكان بى حدره بادرتو بيتلقاك بى عتره وبستناك تقول الروب قبل ما يشممك سكينو يا بتوب يا بيوسدوك الطوب والراجل يحمر عينو كمان بى كلمه بتخاويهو وبى بسمه بجيك خيرو لا بتقدر تعيش من دونو لا بتختاهو لى غيرو زول الماهو عاجبك ده بلا توجيه ولا تعليم أديب و فهيم هميم وكريم و فطرة ربو من يوم خلقو لا فتان و لا خوان أخو أخوان بكفي الألف و الألفين من الضيفان و لو اضطر يرهن ولدو و ان ما كفى باع بيت أهلو و الجيران زول الماهو عاجبك ده يوم تحتاجلو بتلاقيهو أكان ورطان وكان جيعان و كان وجعان و كان سجمان قبل تتأوه و تناديهو يمين في أقل من برهه و بين مد الألف و الها قبل ناسك بجيك حفيان بضمد جرحك و بداويهو بكتل أبدرقه بى إيديهو بطفي الواقده بى رجليهو ما بتغباههو لما تدورو بتلاقيو مكان حاريهو اللافيبا راسو الزول و متباهيبه إسمها عمه سنة سيد الأسياد المعصوم شفيع الأمه و سيما الأوليا الزهاد قلال الزاد كبار الهمه و تاج العزة و الجبره و رمز الطيبه و الحكمه و الملفوف على المبروكه إسمو التوب لباس العفه و الحشمه أزيدك من فضول القول ولا خلاص عرفت الزول ده جمل الشيل دخري الحوبه فارس العتمه ساري الليل لبيب و زكي و نجيب بلحيل فهيم فهماً يهد الحيل تقول لي ما فهمت عليك عيد القتو لي تاني ! واجيب فهامه عاد من وين كلامي القتو ألماني؟ أخير ليك تمشي تختاني وتنسى الزول و تنساني وفوت قبال تعاديني و اقول اللوح ده عاداني و يكفي الزول و يكفيني إني و إنو سوداني | |
|
جمال كمبال مشرف
عدد المساهمات : 271
تاريخ التسجيل : 24/07/2010 تماااااام
| موضوع: رد: أنـا الغلــــطان -للشاعر صلاح سيد احمد الغول الإثنين أغسطس 23, 2010 2:32 pm | |
| اهـ يازوووووول ياريق
كيف يكون الحال لو ما كنت سوداني وأهل الحاره ما أهلي والله اخي ناجي القصيدة أعجبتني كثيراً وكلمة زول فيها عزتنا ، وهي تميزنا وكم احب ان يناديني الاجانب بهذه الكلمة لان احس انها تعطيني كينونتي وأنتمائي الذي اتشرف به ، وأعيب على بعض أخواننا المغتربين تضايقهم من كلمة زول مما جعل بعض الناس يقولها لك ليزهجك ، ولو اننا تقبلناها منهم باعزاز لما قالوها لنا من هذا الباب ، هي التي تميزني عن باقي الجنسيات الأخرى زيها زي العمة والجلابية التي نفاخر بها جميع الجنسيات بأننا لنا لباس وطني ...
اخي العزيز احب كلمة أحب ان يناديني بها هي كلمة زول يازووووووووووووووول يارايق تقبل المرور | |
|
ابو النجا البشير مشرف
عدد المساهمات : 324
تاريخ التسجيل : 13/08/2010
| موضوع: رد: أنـا الغلــــطان -للشاعر صلاح سيد احمد الغول الجمعة أغسطس 27, 2010 3:26 pm | |
| شكرا جمال فتح العليم كمبال شكرا على مرورك الانيق يامبدع | |
|
احمد غازي Admin
عدد المساهمات : 99
تاريخ الميلاد : 03/12/1969 تاريخ التسجيل : 23/07/2010 54 الموقع : السعوديه \جده رايق
| موضوع: رد: أنـا الغلــــطان -للشاعر صلاح سيد احمد الغول الخميس سبتمبر 09, 2010 11:42 am | |
| جزاك الله خير: الموضوع جدا جميل | |
|
ابو النجا البشير مشرف
عدد المساهمات : 324
تاريخ التسجيل : 13/08/2010
| موضوع: رد: أنـا الغلــــطان -للشاعر صلاح سيد احمد الغول الخميس سبتمبر 16, 2010 1:35 pm | |
| الاعزاء جمال واحمد غازى اشكركم على المرور والردود...حتما ستكون زادى للمواصله | |
|