منتديات دار الثغر جبيت { الاجتماعي * الثقافي * الرياضي }
اهلا وسهلا بك عزيزي الزائر او العضو اتمنى قضاء امتع الاوقات

في رحاب منتدانا الوليد ودمتم في حفظ الله ورحايته


***الاداره***

منتديات دار الثغر جبيت { الاجتماعي * الثقافي * الرياضي }

منتديات دار الثغر جبيت الاجتماعي الثقافي الرياضي
 
الرئيسيةالتسجيلدخول

شاطر | 
 

 ذوق جيل

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
محمد تاج السر

avatar

ذكر عدد المساهمات : 4

تاريخ التسجيل : 21/08/2010

مُساهمةموضوع: ذوق جيل   الأحد أغسطس 22, 2010 2:39 pm


جلسة ما منظور مثيلا
ذوق جيل سهرة عاملاها قناة هارموني
خلوني احكيها ليكم
وانتو بعداك قيمو ذوق الجيل


استديو ظريف والمذيعة (هدى عمر) بترحب بضيوفه
من تعاين للضيوف الفنانين الجل ما يديك الدرب والغويشات تطوق الايادي والصدور مفتوحة مرحبة تظهر السلاسل المتدلية من الأعناق لزوم الوجاهات وكده
الصحفي الأستاذ (طارق شريف) ... الأستاذ الفنان قرقوري الشهير بأحمد حسن ... علي قول السر قدور قال الفنان جمال فرفور الشهير بجمال مصطفى
الأستاذ الفنان (نزار المهندس )، الأستاذ الفنان (سامي عز الدين )، الأستاذ الفنان سليل أسرة الفن العريقة (أحمد البناء ).
والشاعر الكبير الأستاذ (أيمن بشير) حامل لواء إصلاح المجتمع ذي ما قال أول من أدوه فرصة يتكلم قال نحن بنصلح في المجتمع



بعد شوية أدركت ان كل هذه الزمرة من الأساتذة يجمعها الأستاذ (أيمن بشير) بقصائده المصلحة للمجتمع كل فنان من ديل ايمن ماديه غنية غنيتين فلمن لا يعرفون أيمن فهو صاحب الأغنيات المشهورات (مهند ونور ، حركتك جبانة والكثير الكثير )


الصحفي الأستاذ (طارق شريف) عارض وبشدة ما ينتجه هؤلاء الأساتذة من أغنيات واصفاً إياها بمصطلح كنت بفتش ليهو وما لاقيه قال دي أغنيات (ممارسة العنف ضد المحبوبة) لو استمعت للأغنيات حتلقاها كلها بتحقق المفهوم دا




ادو الفرصة للمصلحين عشان يظهروا للناس فنهم بدأ قرقوري باغنية مهند ونور وبعداك أدو الفرصة لنزار المهندس غني (أقول ليك بأمانة عمليتك ما ظريفة وحركتك جبانة ) والشيالين يعجبوك رقيص مع الغناء بحس بيهم كانو بغيظو في (طارق شريف) ول مندمجين مع الفن الله أعلم .


أتكلم نزار المهندس وقال الاغنيات دي بتعالج قضايا في المجتمع اسمحوا لي اغني اغنية الشاعر منو كده ما عارف انا بحييه من هنا وربنا يديم عليه الصحة وبغني اغنيته
* موسيقي تم ترااالا تم تم ترن
الفي ريدو فرط ... دقس *** بجي غيرو يعمل مقص
(الترجمة جايه ما تخافوا )
طبعا فرط كلمة عربية جاية من التفريط أي فقدان الشي مع الإهمال في المحافظة عليه
دقس : أي راحت عليه
مقص : دي ما مغص بتاع البطن داك مع انو الغنية تعمل مغص بس مقص هنا قاصدين بيها مقص الحلاقة لكن برضو ما هو المقصود مقص كلمة تستخدم للزول البجي يقص ليك أي يختف منك الفردة بتاعتك او يقص ليك في أي حاجة تلقاه منحشر وشايلة منك



* تحدثت المذيعة اللماعة (هدي عمر) (انا قاصد لماعة دي عشان المذيعة بترقش ) تحدثت عن أنواع الرقصات (القسم مروراً بالنبق النبق والجديد في عالم الرقيص رقصة النمل ودي قالت الراقصين بيتكرشو ذي المعضعضم نمل )



* الفنان سامي عز الدين قال عندو غنية (قمر الزمان)لشاعر رفض ذكر اسمو لانو القصة خاصة بيهو بيحيهو برضو ويلا نسمع : (انا قلت يمكن تكون دي قمر الزمان بتاعت مصطفي سيد احمد)


موسيقي : ترم تري رم تري
قمر الزمان مالك يازول *** ترن تري رم تري
حبيبي شافوه خالط في جنينة ** تري رم تري
(انتو قايلني مؤلف الكلام دا صاح والله ما بهتهم اتخيل دا اصلاح واتخيل دي اغاني ودا ذوق جيل )
* الفرصة الآن عند الشاعر الاستاذ (أيمن) بعد صلح قعدتو وعاين للمجهول قال (نحن لازم نحدد مكان المعضلة ونقدر نحلها من خلال المكان)
(الله ينعلني كان فهمت شئ لكن قلت يمكن دا كلام كبار علي دا كلام شعراء لو سمحتوا كان زول عرف القاصدو الاستاذ دا يوريني)




* الفرصة الآن مع الفنان سليل أسرة الفن العريقة أحمد البناء غني قال
موسيقي : تن ترش ترش كب كرب طخ طرخ كرررررو
واجهني بتحداك واجهني بالقلتو
مشيتة ليك مرات بس انت كترتو (تعرف دا كلو عشان لقاك مسكين اديهو في راسو )
برشو بالموية الزول البرشك دم (طخو يا هريدي)
الببقي ليك عدو انا لي ود عم (انا وابن عمي ع الغريب)
سهلت لي سكة قصرت لي مشوار
.......................




المهم دا كان ذوق الجيل انتو رايكم شنو انا من وجهة نظري الضيقة ان الناس ديل ما قادرين يفرزو بين الغناء والطرب يعني ممكن الاغنيات دي تطربك في حفلة عشان الموسيقي والصولات لكن مستحيل تستمتع بالاغاني دي وتكتب كلماته وترسلة في رسالة وبتاع أمور الحب ديك دي اغاني كبيرة شهرين تلاته وتتلاشي فقاعات (سنة يا ولد)
الرجوع الى أعلى الصفحة اذهب الى الأسفل
جمال كمبال
مشرف
مشرف
avatar

ذكر عدد المساهمات : 271

تاريخ التسجيل : 24/07/2010
المزاج تماااااام

مُساهمةموضوع: رد: ذوق جيل   الأحد أغسطس 22, 2010 3:12 pm

الاخ محمد تاج السر
اطلالتك اسعدتنا
والجيل ده ياتو جيل ؟ ... جيل قادم بمفهوم كل عام ترزلون
أخي الجيل ده معقول يكون مر مرور الكرام على ارثنا الثقافي والموسيقي وكل الجميل في شعرنا يعني مافي واحد فيهم استمع لشعر الحاردلو مثلاً مصطفي سند، ازهري محمد والقائمة طويلة طيب بلاش.... ماسمعوا شئ من الحقيبة ؟
معقولة بس .في ناس كده ؟ في شعر كده ؟ الله يكفينا شر ذوق الجيل ده ديل فقدو كل الحواس .......
أ اخي تقبل مروري ولي عودة
الرجوع الى أعلى الصفحة اذهب الى الأسفل
 
ذوق جيل
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات دار الثغر جبيت { الاجتماعي * الثقافي * الرياضي } :: القسم العام-
انتقل الى: